2021 йил 11 март куни Оролни қутқариш халқаро жамғармаси Давлатлараро барқарор ривожланиш комиссияси (ДБРК) Маслаҳат кенгашининг биринчи онлайн йиғилиши бўлиб ўтди.
Маълумот учун: Давлатлараро барқарор ривожланиш комиссияси Орол денгизи ҳавзаси муаммолари бўйича давлатлараро кенгаш қарори билан 1994 йил 19 июлда ташкил этилган. Комиссия Марказий Осиё мамлакатларининг атроф-муҳитни муҳофаза қилиш ва барқарор ривожланиш соҳасидаги минтақавий ҳамкорликни мувофиқлаштиради ва бошқаради.
Йиғилишнинг мақсади – Маслаҳат кенгаш аъзоларини Комиссиянинг фаолияти билан таништириш, Минтақавий дастур доирасида атроф-муҳитни муҳофаза қилиш ҳамда иқтисодий ривожланиш масалаларида ҳамкорликни мустаҳкамлашдир.
|
|
Ўзбекистон Республикаси Экология ва атроф-муҳитни муҳофаза қилиш давлат қўмитаси ва Давлатлараро барқарор ривожланиш комиссияси Илмий-ахборот марказининг Ўзбекистондаги филиали ҳамкорлигида ташкил этилган тадбирда ДБРК аъзо мамлакатларининг атроф-муҳит муҳофаза қилиш ва иқтисодиёт вазирликлари, БМТнинг Атроф муҳит дастури (ЮНЕП), БМТнинг Европа иқтисодий комиссияси, Германия халқаро ҳамкорлик агентлиги, Марказий Осиё минтақавий экологик маркази, БМТнинг қишлоқ хўжалиги ва озиқ-овқат дастури (ФАО), АҚШ халқаро ривожланиш агентлигининг Сув ва атроф-муҳит бўйича минтақавий дастури мутахассислари иштирок этдилар.
Барқарор ривожланиш ғояси жамиятимиз ҳаётида фаол татбиқ этилиб, инсоният, жамият ва табиат ўртасидаги ўзаро уйғунликка эришишга йўналтирилган.
2019 йил октябрь ойида Қорақалпоғистон Республикасининг Нукус шаҳрида юқори даражадаги «Оролбўйи – экологик инновациялар ва технологиялар ҳудуди» халқаро конференцияси доирасида Оролни қутқариш халқаро жамғармаси Давлатлараро барқарор ривожланиш комиссиясининг (ДБРК) йиғилишида Давлатлараро барқарор ривожланиш комиссиясига раислик қилиш Туркманистондан Ўзбекистон Республикасига ўтди.
Давлатлараро барқарор ривожланиш комиссияси раиси, Давлат экология қўмитаси раиси Алишер Максудов ўз маърузасида Давлатимиз раҳбари ташаббуси билан Оролбўйи минтақасида олиб борилаётган ислоҳотларга тўхталиб ўтди.
Бир пайтлар Орол денгизи дунёдаги тўртинчи катта денгиз бўлган саналарди. Бугун унинг қуриши сайёрадаги энг долзарб экологик фалокатлардан бири сифатида қайд этилмоқда. Ўз навбатида, бу Марказий Осиё мамлакатлари учун бир қатор экологик, ижтимоий-иқтисодий ва гуманитар муаммоларни келтириб чиқарди.
Орол денгизининг фалокати глобал муаммога айланган. Бугунги кунда бу масала дунёдаги халқаро ташкилотлар, сиёсатчилар, олимлар ва экспертларнинг диққат-эътиборини талаб қилмоқда.
Президентимиз Шавкат Мирзиёев Бирлашган Миллатлар Ташкилоти Бош Ассамблеяси сессияларида сўзлаган нутқида Орол денгизининг экологик фалокатига алоҳида эътибор қаратди. Негаки, унинг оқибатларини бартараф этиш халқаро миқёсдаги саъй-ҳаракатларни фаол бирлаштириш билан боғлиқдир.
Кун тартибида бир қатор масалаларни кўриб чиқиш, жумладан, Маслаҳат кенгашининг фаолияти, ДБРК нинг атроф-муҳитни муҳофаза қилиш, барқарор ривожланиш мақсадларига эришишда БМТнинг Атроф муҳит дастури (ЮНЕП), БМТнинг Европа иқтисодий комиссияси, Германия халқаро ҳамкорлик агентлиги, Марказий Осиё минтақавий экологик маркази, БМТнинг қишлоқ хўжалиги ва озиқ-овқат дастури (ФАО), АҚШ халқаро ривожланиш агентлигининг Сув ва атроф-муҳит бўйича минтақавий дастурлари билан ҳамкорлик қилиш каби масалалар муҳокама қилинди.
|
|
|
|
Давлат экология қўмитаси
Матбуот хизмати
