O‘zbekistonda tashlanmalar Milliy reyestri yaratiladi
02.
12. 2023
18:03
2743
Янгиликлар

BMTning iqlim o‘zgarishi bo‘yicha 28-konferensiyasi (COP28) doirasida Ekologiya, atrof-muhitni muhofaza qilish va iqlim o‘zgarishi vaziri Aziz Abduhakimov va "Industrial Innovation Group" bosh direktori Taryam Matar Taryam o‘zaro anglashuv memorandumini imzoladilar. Hujjat Milliy uglerodli kredit tizimini yaratish doirasidagi hamkorlikka qaratilgan.

Ma’lumot uchun: Industrial Innovation Group – bosh qarorgohi BAAda joylashgan transmilliy kompaniyalar guruhi. U murakkab, yuqori texnologiyali tizimlarni yaratish, yirik sanoat va innovatsion majmualarni loyihalash va qurish bo‘yicha 30 yillik katta tajribaga ega. Tashkilot turli biznes tarmoqlari uchun barqaror yo'llarni ishlab chiqadi, uglerod xavfini kamaytirish tashabbuslarini konseptuallashtiradi, turli uglerod kredit registrlari uchun dizayn hujjatlarini yaratadi, shuningdek, bioko'mir - "Hemporama Biochar"ning global ishlab chiqaruvchisi hisoblanadi.

Memorandum O‘zbekistonning tashlanmalarni kamaytirish bo‘yicha milliy strategiyasiga muvofiq tuzilgan. Bunga qadar Ekologiya, atrof-muhitni muhofaza qilish va iqlim o‘zgarishi vazirligi atmosferaga chiqarilayotgan gazlarni hisobga olish bo‘yicha Milliy reyestrni yaratish tashabbusi bilan chiqqandi.

Uchrashuvda Aziz Abduhakimov reyestrning yaratilishi iqlim o‘zgarishi muammosini hal etishda samarali yondashuv ekanligini, mavjud tashlanmalarni tartibga solish  va kamaytirish bo‘yicha loyihalarni rag‘batlantirish tizimlarini integratsiyalashda muhim ahamiyat kasb etishini ta’kidladi.

O‘z navbatida Matar Taryam mazkur reyestrni yaratishga hissa qo‘shish tashkilot uchun katta sharaf ekanligini qayd etdi. U ushbu hamkorlikning yo‘lga qo‘yilgani O‘zbekistonning barqaror rivojlanish va ekologik xavflarni kamaytirishga intilishidan dalolat berishini, bu esa bugungi kundagi global iqlim muammolari sharoitida, ayniqsa, muhim ekanini ta’kidladi.

Shuningdek, kompaniya vitse-prezidenti Anna Chekanova reyestrning muhimligini qayd etdi.

“Dunyo iqlim inqirozini yumshatish va tashlanmalarni kamaytirish texnologiyalarini ishlab chiqishda sezilarli yutuqlarga erishdi. Bugun barcha bilim va innovatsiyalarni amaliyotga tatbiq etishning ayni vaqti. Reyestr iqlim ekotizimining barcha ishtirokchilarini birlashtirgan yagona platforma bo‘lib, belgilangan ekologik maqsadlarga samarali va amaliy erishishga xizmat qiladi”, — dedi A.Chekanova.

O‘zbekistonning birgalikdagi tashlanmalar inventarizatsiyasi mamlakatning ekologik izlarini to‘g‘ri baholash va uglerodni nazorat qilish tashabbuslari asosini ishlab chiqish uchun ishonchli yondashuv hisoblanadi. Reyestr tashlanmalarni muntazam ravishda kuzatib borish va uglerod xavfini kamaytirish loyihalarini aniq baholashi mumkin bo'lgan keng qamrovli platforma bo'lib xizmat qiladigan muhim havolani yaratadi.

Фойдали манбалар